ಭಾವಪೂರ್ಣ ಶ್ರದ್ಧಾಂಜಲಿ

_*ಹುಬ್ಬಳ್ಳಿಯಲ್ಲಿ ಹಿಂದೂ ಜನಜಾಗೃತಿ ಸಮಿತಿಯಿಂದ ಆಧ್ಯಾತ್ಮಿಕ ಸಾಧನೆಯ ಬಗ್ಗೆ ಸಂತರ ವಿಶೇಷ ಪ್ರವಚನದ ಆಯೋಜನೆ !*_

*ಹುಬ್ಬಳ್ಳಿ :* `ಇಂದು ಧರ್ಮಾಧಾರಿತ ಸಂಘಟನೆ ಮಾಡುವ ಅವಶ್ಯಕತೆಯಿದೆ. ಭಾರತಕ್ಕೆ ಲಕ್ಷಾಂತರ ವರ್ಷಗಳ ಇತಿಹಾಸವಿದೆ, ಹಿಂದೆ ರಾಜರು ಸತ್ಯ, ನ್ಯಾಯ, ಧರ್ಮ ಮತ್ತು ನೀತಿವಂತ ಆದರ್ಶ ರಾಜ್ಯಾಡಳಿತ ಮಾಡುತ್ತಿದ್ದರು. ಜಗತ್ತಿಗೆ ಜ್ಞಾನವನ್ನು ನೀಡುವ ಶ್ರೇಷ್ಠ ಗುರುಕುಲ ಶಿಕ್ಷಣ ಪದ್ಧತಿಯು ಭಾರತದ ಬೆನ್ನೆಲುಬಾಗಿತ್ತು, ಮನುಷ್ಯ ತನ್ನ ವ್ಯಕ್ತಿಗತ ಜೀವನವನ್ನು ಯಾವ ರೀತಿ ನಡೆಸಬೇಕೆಂದು ಹೇಳಿಕೊಡಲಾಗುತ್ತಿತ್ತು, ಆದರೆ ಇಂದಿನ ಸ್ಥಿತಿ ಇದಕ್ಕೆ ವಿರುದ್ಧವಾಗಿದೆ` ಎಂದು ಸನಾತನ ಸಂಸ್ಥೆಯ ಧರ್ಮಪ್ರಚಾರಕ ಸಂತರಾದ ಪೂಜ್ಯ ರಮಾನಂದ ಗೌಡ ಇವರು ವಿಷಾದ ವ್ಯಕ್ತಪಡಿಸಿದರು. ಅವರು ಹಿಂದೂ ಜನಜಾಗೃತಿ ಸಮಿತಿಯಿಂದ ಬುಧವಾರ ಇಲ್ಲಿಯ ಕನ್ನಡ ವೈಶ್ಯ ಸಮಾಜದ ಶ್ರೀ ಶಂಕರ ಸದನದಲ್ಲಿ ಆಯೋಜಿಸಲಾಗಿದ್ದ ವಿಶೇಷ ಆಧ್ಯಾತ್ಮಿಕ ಪ್ರವಚನದಲ್ಲಿ ಮಾರ್ಗದರ್ಶನ ಮಾಡುತ್ತಿದ್ದರು, ಈ ವೇಳೆ ಹಿಂದೂ ಜನಜಾಗೃತಿ ಸಮಿತಿಯ ಸಮನ್ವಯಕರಾದ ಶ್ರೀ. ಚಂದ್ರಶೇಖರ್ ಉಪಸ್ಥಿತರಿದ್ದರು. 100 ಕ್ಕೂ ಅಧಿಕ ಹಿಂದೂ ಬಾಂಧವರು ಈ ಪ್ರವಚನದ ಲಾಭ ಪಡೆದುಕೊಂಡರು.

ಪೂಜ್ಯ ರಮಾನಂದ ಗೌಡ ಇವರು ಮಾರ್ಗದರ್ಶನ ಮಾಡುತ್ತಾ, `ಮೊಘಲರು ಮತ್ತು ಬ್ರಿಟೀಷರು ಆಕ್ರಮಣದ ನಂತರ ನಮ್ಮ ದೇಶದ ನಿಜವಾದ ಅಸ್ತಿತ್ವವೇ ಇಲ್ಲದಂತಾಯಿತು. ಲಾರ್ಡ್ ಮೇಖಾಲೆಯ ಪಾಶ್ಚಾತ್ಯ ಶಿಕ್ಷಣ ಪದ್ಧತಿಯಿಂದಾಗಿ ಇವತ್ತಿನ ಸ್ಥಿತಿ ಬುಡಮೇಲಾಗಿದೆ, 1835 ರ ನಂತರ ಹಿಂದೂಗಳಿಗೆ ಧರ್ಮದ ಶಿಕ್ಷಣ ಸಿಗದಿರುವುದರ ಪರಿಣಾಮ ಜನರು ತಮ್ಮ ಸ್ವಾರ್ಥವನ್ನೇ ಮೆರೆಯುತ್ತಿದ್ದಾರೆ, ಇವತ್ತಿನ ಶಿಕ್ಷಣ ಪದ್ಧತಿಯಲ್ಲಿ ಕೇವಲ ಹಣ ಗಳಿಸುವುದು ಹೇಗೆ ಎಂದು ಕಲಿಸಲಾಗುತ್ತಿದೆಯೇ ಹೊರತು ನಮ್ಮ ಆಚರಣೆ, ಸಂಸ್ಕಾರದ ಬಗ್ಗೆ ಎಲ್ಲಿಯೂ ಶಿಕ್ಷಣ ದೊರೆಯುತ್ತಿಲ್ಲ. ಜನರಲ್ಲಿ ಧರ್ಮಾಭಿಮಾನ ಶೂನ್ಯವಾಗಿದೆ, ಕುಟುಂಬ ಭಾವನೆ ಒಡೆದುಹೋಗಿದೆ. ಮನುಷ್ಯ ಶಡ್ರಿಪುಗಳ ಹಿಡಿತದಲ್ಲಿ ಸಿಲುಕಿದ್ದಾನೆ, ಕರ್ಮಫಲ ನ್ಯಾಯವು ಎಲ್ಲರಿಗೂ ಅನ್ವಯವಾಗುತ್ತದೆ, ಹಾಗಾಗಿ ಪ್ರತಿಯೊಬ್ಬರೂ ಸತ್ಕರ್ಮಗಳನ್ನೇ ಮಾಡಬೇಕು, ಪಾಪಕರ್ಮಗಳನ್ನು ಮಾಡಿದರೆ ಅದರ ಪ್ರತಿಫಲವನ್ನು ಬೋಗಿಸಲೇಬೇಕಾಗುತ್ತದೆ, ಇಂದಿನ ದುಸ್ಥಿತಿಯನ್ನು ಸರಿದೂಗಿಸಲು ಧರ್ಮ ಮತ್ತು ಆಧ್ಯಾತ್ಮದ ಆಧಾರದಲ್ಲಿ ಜೀವನ ಸಾಗಿಸುವುದು ಅವಶ್ಯಕವಾಗಿದೆ, ಧರ್ಮಾಚರಣೆಯಿಂದಲೇ ನಿಜವಾದ ಸುಖ (ಆನಂದ) ಪ್ರಾಪ್ತಿಯಾಗಲಿದೆ, `ಧರ್ಮೋ ರಕ್ಷತಿ ರಕ್ಷಿತಾಃ', `ಯಾರು ನನ್ನ ನಾಮಸ್ಮರಣೆ, ಸೇವೆ ಮಾಡುತ್ತಾನೆಯೋ ಅವರ ಕಾಳಜಿ ನಾನು ಮಾಡುತ್ತೇನೆ' ಎಂದು ಶ್ರೀ ಕೃಷ್ಣ ಭಗವದ್ಗೀತೆಯಲ್ಲಿ ಹೇಳಿದ್ದಾನೆ, ಸ್ವಾರ್ಥ ಜೀವನ ನಡೆಸಿ ಭೂಮಿಗೆ ಭಾರವಾದವರನ್ನು ಭಗವಂತನೇ ತೆಗೆಯಲಿದ್ದಾನೆ. `ಅನ್ನದಾನ ಕೇವಲ ಒಂದೇ ದಿನಕ್ಕೆ ಸೀಮಿತ, ವಸ್ತ್ರದಾನ, ವಿದ್ಯಾದಾನ ಕೆಲವು ವರ್ಷಗಳಿಗೆ ಸೀಮಿತ. ಆದರೆ ಧರ್ಮದ ಪ್ರಸಾರ ಮಾಡಿದರೆ ಜೀವನೇ ಸಾರ್ಥಕವಾಗುತ್ತದೆ` ಎಂದು ಸ್ವಾಮಿ ವಿವೇಕಾನಂದರು ಹೇಳಿದ್ದಾರೆ. ಧರ್ಮಪ್ರಸಾರ ಮಾಡುವ ಸಂಘಟನೆಗಳೊಂದಿಗೆ ಕೈಜೋಡಿಸಿ ಧರ್ಮಪ್ರಸಾರ ಕಾರ್ಯದಲ್ಲಿ ಕೈಜೋಡಿಸಬಹುದು,

 `ಸನಾತನದ ಆಶ್ರಮಗಳಲ್ಲಿ ನಾವು ಶಡ್ರಿಪುಗಳ ನಿರ್ಮೂಲನೆಗಾಗಿ ಹಾಗೂ ಆಧ್ಯಾತ್ಮಿಕ ಸಾಧನೆಗಾಗಿ ಸ್ವಭಾವದೋಷ-ಅಹಂ ನಿರ್ಮೂಲನಾ ಪ್ರಕ್ರಿಯೆ, ಕ್ಷಮಾಯಾಚನೆ, ಪ್ರಾಯಶ್ಚಿತಗಳ ಪಾಲನೆ ಮಾಡುತ್ತೇವೆ, ಜೀವನವನ್ನು ಆನಂದಮಯವಾಗಿಸಲು ಧರ್ಮಾಚರಣೆ ಮಾಡಿ`ಎಂದು ಅವರು ಉಪಸ್ಥಿತರಿಗೆ ಕರೆ ನೀಡಿದರು.